CONVÓCASE AO ALUMNADO A FORMAR PARTE DA AULA DE TEATRO AVELAÍÑAS DO LOSADA_CURSO 2024-2025

Se queres formar parte da Aula de teatro Avelaíñas, achégate á reunión que terá lugar este xoves, 26 de setembro no salón de usos múltiples ás 12:25.

Ven e goza do teatro!

 

ALMANAQUE DO 1º TRIMESTRE. XA PODES CONSEGUILO

 

 

Un curso máis o EDLG do Losada ofréceche unha ferramenta útil para organizáreste mellor: o almanaque mensual

Nesta ocasión, cada mes está dedicado a un grupo ou interprete musical feminina da música galega contemporánea, e aínda quedou sitio para incluír un refrán do mes.

Comezamos con Fillas de Cassandra, Caamaño&Ameixeiras, A Banda da Loba e Guadi Galego

Xa está nas aulas, pero aquí, podes descargar e imprimir o teu almanaque:

Almanaque EDL_LOSADA 24-25-1ºT by elogolosada

DINAMIZA TV 2024

Un ano máis, e xa van tres, o EDLG do Losada participou no proxecto impulsado polo Concello da Estrada, DINAMIZA TV. Nesta ocasión foi o alumnado de 1º ESO A o encargado de realizar todos os traballos para a realización do noso particular informativo. Moi interesante e entretido. Parabéns!!!

Aí podedes gozar co vídeo:

OUTRO CURSO DE MOITO TEATRO NO LOSADA

A aula de teatro AVELAÍÑAS do Losada forma parte do proxecto que leva adiante todos os anos o EDLG do centro. Un curso máis un grupo de 20 rapaces e rapazas traballou duro todos os martes, e algúns días máis para levar o galego ao escenario e compartilo con todos nós. Este ano, ademais da participación na homenaxe a Olimpio Arca. 

Nunha nova anterior explicamos o programa de funcións do grupo e aquí deixamos unha foto do grupo ao final das mesmas, acompañado polas fillas de Olimpio Arca, profesora e escritor autor da obra escollida para este ano. Podes picar nela e ver todas as fotos.

Queremos felicitar a todos e todas as compoñentes do grupo, así como ao seu director Fran Campos, polo magnífico traballo realizado este curso. Viva o teatro no Losada!

E podes gozar coa obra completa neste vídeo:

ENTREGA DOS PREMIOS DO CONCURSO DE FOTOGRAFÍA DAS LETRAS GALEGAS 2024

 Ana Parada, orientadora do centro e Raquel Rodríguez profe de Plástica, entregaron en representación do EDLG os premios do concurso de fotografía "As palabras de Luísa Villalta".

Achegamos a acta do xurado e a imaxe da entrega de premios.

FALLO DO XURADO DO CONCURSO DE FOTOGRAFÍA XELA ARIAS

LETRAS GALEGAS 2024

O Xurado do Concurso de Fotografía AS PALABRAS DE LUÍSA VILLALTA das Letras Galegas 2024 valorou moi positivamente a cantidade e calidade dos traballos presentados ao mesmo.

Foi complicado facer a escolla das imaxes finalistas que reuniron orixinalidade, calidade e adecuación ao poema escollido por cada unha delas.

O xurado quere facer felicitar a estes finalistas e a todos e todas os participantes polo traballo realizado.

A elección dos gañadores e gañadoras foi realizada por votación de 20 representantes do profesorado e doutros sectores da comunidade educativa do Losada.

Así, unha vez feito o reconto de votos,  o xurado decidiu outorgar as seguintes mencións e premios:

-Mención para 3 das fotografías finalistas, que recibirán unha lámina da deseñadora Rosa de Cabanas na que se retrata a Maruja Roca, unha das primeiras fotógrafas galegas e un bolígrafo do Losada.

Son:

Lois Fieiro Ameijeiras, de 1º ESO B

Iria Pérez Martínez, de 4º ESO A

Lara Rey Rosende, de 4º ESO B

-Segundo premio do concurso que recibirá unha lámina como as anteriores, un bolígrafo do Losada e o libro de fotos antigas da Estrada, IMAXES PARA A LEMBRANZA, para

Lía Vieites Carballo de 1º BAC B

-E primeiro premio do concurso, que recibirá unha lámina como as anteriores, un bolígrafo do Losada e unha fotografía do artista estradense Alberte Peiteavel con enmarcación artesá de Casal de Creación para:

Enma Duro Sanmartín  4º ESO B

 

A REVISTA DO EDLG 2024

Xa circula de man en man a nosa publicación. Moitas páxinas con artigos, crónicas, reportaxes, ilustración, creación, unha fermosa capa a toda cor realizada pola profe de Plástica, Raquel Rodríguez Reino, que tamén forma parte do EDLG.

 Podes descargala e gozar dela a toda cor aquí:

ELOGHO? 2024 by elogolosada

SEMANA DE MOITO TEATRO NO LOSADA

Esta semana, a última do curso, a aula de teatro Avelaíñas do Losada estreará a peza teatral na que levan traballando estes meses. Trátase dun clásico do teatro estradense: Pelexa no Souto, do inesquecible profesor e escritor Olimpio Arca Caldas. Ecoloxía, terra, valores, respecto e tamén moito humor nesta obra que sempre está de actualidade.

Cartel e elenco da obra (deseño Brais Nogueira Corral)

 

A redacción do EDLG coouse nun ensaio de Avelaíñas e puidemos tirar algunha foto. A cousa promete.

 

Aquí queda o programa de actuacións para esta última semana teatral do curso:

18 de xuño, martes

Estrea da obra Pelexa no souto, de Olimpio Arca Caldas, a cargo da aula de teatro Avelaíñas do Losada.

Lugar: salón de usos múltiples.

Horario: 16:30 a 17:20

Grupos: 1º ESO e 3º ESO

19 de xuño, mércores

Posta en escena da obra Pelexa no souto, de Olimpio Arca Caldas, a cargo da aula de teatro Avelaíñas do Losada no IES O Carril (Vilagarcía de Arousa)

20 de xuño, xoves

Posta en escena da obra Pelexa no souto, de Olimpio Arca Caldas, a cargo da aula de teatro Avelaíñas.

Lugar: Salón de usos múltiples

Horario: 13:35 a 14:25

Grupos: 2º ESO, 4º ESO e 1º BAC

 

20 de xuño, xoves

Posta en escena da obra Pelexa no souto, de Olimpio Arca Caldas, a cargo da aula de teatro Avelaíñas.

Lugar: Salón de usos múltiples

Horario: 21 horas

Destinado a familias e público en xeral. Entrada gratuíta.

ASÍ FOI A PARTICIPACIÓN DO LOSADA NO CORRELINGUA 2024

O martes 28 de maio, despois de ser adiado polo mal tempo, celbrouse unha nova edición do Correlingua, baixo o lema DE AQUÍ ATÉ ACOLÁ, GALEGO XÁ!.

O Losada enviou unha magnífica representación a través do alumnado de 3º ESO, que ademais traballou nos días previos na elaboración de dúas pancartas que luciron no envento.

Aí quedan as fotos:

 

 

PREMIADOS E PREMIADAS DO LOSADA NA XI FESTA DAS PALABRAS DE DINAMIZAESTRADA

Outra noite especial chea de palabras. O pasado mércores 22 de maio o Teatro Principal da Estrada ateigouse de xente para aplaudir aos gañadores e gañadoras da XI Festa das Palabras #DINAMIZAESTRADA. E claro, alí estiveron os nosos rapaces e rapazas recollendo o seu premio: Iria Pérez, Pablo Rosende, Xabier Ferro, Iago Lueiro e Joel Rivadulla (Lidia Márquez, premiada tamén, non puido asistir. 

Representación do Losada na Festa. Premiados/as con Ana Paarada e Xabier Camba

 Moitos parabéns a todos e a todas, e tamén a Dinamizaestrada por esta festa tan ben organizada, na que non faltou a música, da man de Lucía Azurmendi grupo. E como non, apadriñados e apadriñadas polo escritor e profesor estradense Carlos Loureiro. Podes ver moitas máis fotos da Festa AQUÍ

UNHA LECCIÓN DE CINE (en galego). AS NEVES

75 alumnos/as e profes de 4º ESO e 1º BACHARELATO do Losada achegáronse no día de onte, 22  de maio, aos Minicines Central para gozar coa proxección da película AS NEVES dirixida por Sonia Méndez. 

Trátase dun filme galego ambientado nunha vila galega de montaña, As Neves, onde todos se coñecen. A noite de Entroido un grupo de adolescentes celebran unha festa e dróganse con cogomelos por primeira vez. Ao día seguinte espertan cun temporal de neve e a noticia de que Paula, unha das mozas da festa, desapareceu. Mentres, a vila queda incomunicada e cae Internet. Cada vez é máis urxente atopala. Iníciase unha investigación que causará un profundo cambio nas súas vidas e na súa relación co mundo.

                                                        Imaxes dos/das asistentes ao rematar a película.

O visionado da película non deixou indiferente a ninguén a xulgar polos comentarios posteriores á proxección e que animaron o camiño de volta ao instituto.

Ademais o Departamento de Orientación coa colaboración do EDLG elaborou un caderno de traballo que podes consultar e descargar:

As Neves. Caderno de traballo by elogolosada

ASÍ SERÁ A PARTICIPACIÓN DO LOSADA NA XI FESTA DAS PALABRAS DINAMIZAESTRADA 2024

Foi presentada a undécima edición da FESTA DAS PALABRAS organizada polo colectivo DINAMIZAESTRADA, que agrupa aos Equipos de dinamización da lingua galega dos dez centros educativos da Estrada.

A Festa terá lugar o 22 de maio no teatro principal ás 8 da tarde e podes consultar toda a información sobre a mesma no blog de DINAMIZAESTRADA.

O Losada, coma sempre, estará representado polo alumnado gañador dos concursos de micropoemas e microrrelatos nas súas respectivas categorías. 

Pablo Rosende, Xabi Ferro, Iria Pérez, Xoel Rivadulla, Iago Lueiro e Lidia Márquez

PROXECTO VILLALTA E A CORUÑA. LETRAS GALEGAS 24

O Departamento de Artes Plásticas do Losada levou adiante o proxecto A CORUÑA DE LUÍSA VILLALTA, que presentamos nesta nova. 

Trátase dun total de 9 traballos realizados polo alumnado da materia de Expresión artística de 4º de ESO realizados a partir de candanseu poema da autora dedicado a diferentes lugares da Coruña.

O traballo está explicado nestes dous paneis:

Aí deixamos algunha foto da exposición e do alumnado participante coa súa profe Raquel. Podes ver máis imaxes AQUÍ.

Por se fose pouco, fixeron este fermoso vídeo explicando todo o proxecto:

LETRAS GALEGAS 2024

O EDLG do Losada, a Biblioteca e o Departamento de Artes Plásticas convocan unha nova edición do Concurso Fotográfico das Letras Galegas.

Nesta ocasión poderás escoller algún dos 6 textos de Luísa Villalta  que aparecen no cartel, facer unha fotografía inspirada no que che suxira e enviala a ler.nolosada@gmail.com. Podes enviala ata o día 26 de maio.

Anímate que haberá premios para os mellores traballos.

 Os traballos finalistas exporanse no corredor da biblioteca e en días posteriores farase público o traballo gañador. Está atento/a!!!

Estes días tamén poderas aprender e gozar coa obra de Luísa Villalta. Podes descargar abaixo a publicación preparada polo EDLG Losada.

AS LETRAS DO LOSADA. LUISA ... by elogolosada

ALMANAQUE DO EDLG XA Á TÚA DISPOSICIÓN

XA ESTÁ Á TÚA DISPOSICIÓN O ALMANAQUE COMPLETO DO 3º TRIMESTRE!!!

Neste curso, como fixemos nos anteriores trimestres, cada mes está dedicado a unha escritora da literatura galega contemporánea, e aínda quedou sitio para incluír un refrán do mes.

Seguimos con María Lado, Luísa Villalta e Lupe Gómez. Canta poesía!

Xa está nas aulas, pero aquí, podes descargar e imprimir o teu almanaque:

 

Almanaque EDLG_Losada 3ºtri... by elogolosada

ENTREGA DE DIPLOMAS CONCURSO LITERARIO DINAMIZAESTRADA 2024

O pasado 7 de marzo na Biblioteca do Losada foron entregados os diplomas dos finalistas e gañadores e gañadoras do Concurso de Microrrelatos e Micropoemas do noso centro.

MODALIDADE: MICRORRELATOS_PALABRA ESCOLLIDA: MÚSICA

CATEGORÍA B1, 1º E 2º ESO

Finalistas: ALEIXO AGRA PAMPÍN, 1º ESO  e  ENMA VILLANUEVA SIMÓN, 1º ESO

Gañadora: LIDIA MÁRQUEZ MÉNDEZ, 1º ESO

CATEGORÍA B2, 3º E 4º ESO e FPB

Finalistas: BRAIS NOGUEIRA CORRA,  3º ESO e NOEL RAMOS CARAMÉS, 4º ESO

Gañador: IAGO LUEIRO DOS SANTOS, 1º FPB CARPINTARÍA

CATEGORÍA C, BACHARELATO E CICLOS

Finalistas: XABIER FERRO MIRANDA, 2º BAC  e SARA RIBADAVIA FERRO, 2º BAC

Gañador: PABLO ROSENDE LÓPEZ, 2º BAC

MODALIDADE: MICROPOEMAS_PALABRA ESCOLLIDA: SILENCIO

CATEGORÍA B1, 1º E 2º ESO

Finalistas: LUCÍA RODRÍGUEZ FINS, 1º ESO e ZAIRA COSTA SÁNCHEZ, 1º ESO

Gañador: XOEL RIVADULLA DURÁN, 1º ESO

CATEGORÍA B2, 3º E 4º ESO e FPB

Finalistas: ALEX FERNÁNDEZ GAÑETE, 3º ESO e ADELAIDA VILARIÑO GÓMEZ, 4º ESO

Gañadora: IRIA PÉREZ MARTÍNEZ, 4º ESO

CATEGORÍA C, BACHARELATO E CICLOS

Finalistas: HUGO BOTANA GAÑETE 2º BAC e NAYARA CONSTENLA FINS 2º BAC

Gañador XABIER FERRO MIRANDA 2º BAC

Os traballos gañadores serán publicados nun libro conxunto cos centros de ensino de DINAMIZAESTRADA que lles será entregado aos seus autores e autoras na XI Festa das Palabras que se celebrará no mes de maio no Teatro Principal da Estrada.

Podes ver todas as fotos picando na imaxe:

 A ACTA COMPLETA DO XURADO