Coñecemos Portugal, aprendemos portugués

O IES Antón Losada iniciou este curso a impartición da materia de Portugués como idioma optativo para o alumnado de 1º da ESO. Xa nos tardaba no centro poder achegarnos á lingua irmá e a favorecer ente o alumnado o coñecemento da cultura portuguesa coa que nos unen lazos primeiros da nosa historia. Para poñer en práctica as primeiras nocións aprendidas e coñecer de primeira man este territorio da outra beira do Miño, os alumnos de Portugués do Losada viaxaron este mes, xunto cos doutros centros da contorna, á cidade do Porto. Formidable experiencia de convívio e aprendizaxe!

Patrimonio rehabilitado

Esta semana o alumnado de 3º da ESO do Losada Diéguez percorreu as rúas da fermosa vila de Allariz. Unha vila para andar a pé, para pasmar coa harmonía das construcións ben conservadas e tamén para estar a ben coa natureza. Visitamos o Museo do Xoguete, desfilamos con garbo cos traxes de época do Museo da Moda, achegámonos aos monumentos da vila e aínda tivemos tempo para gozar dunha tarde estupenda na área recreativa do Rexio, reserva da biosfera. Alí acariñamos años, burros e cans, e coñecemos o proceso de elaboración do queixo de ovella. Por certo, delicatessen galega. Unha actividade que forma parte do Proxecto Terra, do Colexio de Arquitectos de Galicia, para a posta en valora da recuperación do patrimonio e a paisaxe.

Xa temos gañadoras e gañadores do Concurso de Micropoemas e Microrrelatos 2019

Esta mañá entregamos na Biblioteca do Losada os diplomas dos finalistas e gañadores e gañadoras do Concurso de Microrrelatos e Micropoemas do noso centro. Estes foron os premiados:


MICRORRELATOS: lenda
Categoría 1º e 2º ESO
Finalista: Nayara Constenla Fins 2º ESO
Gañador: Alejandro Barcala Iglesias 1º ESO

Categoría 3º e 4º ESO
Finalista e gañador: Yassine Ani 2º FPB Servizos Administrativos

Categoría Bacharelato e Ciclos
Finalistas: Alba Navia Carballo 1º BAC e Laura Silva Picallo 1º BAC
Gañador: Telmo Leira Loureiro


MICROPOEMAS: serán
Categoría 1º e 2º ESO
Finalistas: Nuria García Ruibal 2º ESO e Alexandra Paz Carracedo 1º ESO
Gañadora: Eva Cobas Iglesias 2º ESO

Categoría 3º e 4º ESO
Finalistas: Eva Rocamonde Darriba 3º ESO e Luis Ruibal Picáns 3º ESO
Gañadora: María Ribadavia Uzal 4º ESO

Categoría Bacharelato e Ciclos
Finalistas: David Sueiro Durán 2º BAC e María Souto Calvelo 2º BAC
Gañadora: Celia Astorga Herraiz 1º BAC

En hora boa a tod@s!


Ademais, fíxose pública a acta do xurado do VI Concurso de micropoemas e microrrelatos dos Centros de Ensino da Estrada, no que participan os EDLG do CEIP Pérez Viondi, o CEIP Villar Paramá, CEIP Pérez Viondi, CEIP Cabada Vázquez, CPR Plurilingüe N. Sra. de Lourdes, CEIP Plurilingüe de Oca, CEIP do Foxo, CEIP de Figueiroa, IES Nº 1, IES Manuel García Barros e IES Plurilingüe Antón Losada Diéguez. Podes consultar a acta e coñecer todos os gañadores e gañadoras en DinamizaEstrada.

O xurado do certame reunido no CEIP Pérez Viondi

Linguas, todas, para andar polo mundo

Derreadiñ@s vimos despois da nosa estadía en Francia, en intercambio co Collège du Houlme, na Normandía. Unha experiencia de convivencia e aprendizaxe que, abofé, non nos vai esquecer. Da man de O Principiño realizamos este ano unha viaxe fermosa co alumnado de 1º da ESO, compartindo unha semana con familias francesas e co centro escolar de Briouze coa axuda das linguas e das ferramentas de expresión que nos regala o teatro. Aí vos vai a crónica da nosa viaxe!

O domingo 17 de marzo saímos para París. Foi para algúns dos alumnos a primeira viaxe en avión. A chegada de noite a París ben merecía un paseo para vermos a Tour Eiffel iluminada.

Pola mañá erguémonos canda os panadeiros para coller o tren para Briouze. Despois dunha soneca no primeiro tramo, logo nos puxemos mans á obra. Tiñamos aínda moito texto por preparar. Levamos nas mochilas un proxecto ambicioso: poñer en escena, co alumnado francés, unha adaptación trilingüe galego-castelán-francés de O Principiño, de Saint-Exupéry. As partes en francés déronnos bo traballo, aínda que fosen expresións doadas que xa abordamos nas aulas. Pero, aos poucos, fomos logrando dicilas con bo acento e naturalidade. Todo é poñerse!

A media mañá, chegamos a Briouze. A chegada ao collège foi emocionante. O alumnado e o profesorado do centro preparáronnos unha acollida activa, con xogos de grupo que nos meteron de cheo a compartir cos novos compañeiros. Percorremos Briouze ás carreiras buscando pistas. E, cando nos demos de conta, estabamos a parolar amigablemente no patio do collège.

Os alumnos e alumnas galegos integráronse nas clases de Historia, Inglés, Español, Matemáticas... É curioso descubrir como se parecen ás nosas e, ao mesmo tempo, cantas cousas distintas: nos tratamentos de cortesía co profesorado, na organización de patio, nos timbres, que aquí son música para advertir dos cambios de aula... E, polo medio, os primeiros ensaios de teatro. As propostas de expresión corporal de Afonso póñennos en contacto físico e en conexión humana directa. O grupo xa está feito nunhas poucas horas. O teatro é máxico.

No medio da semana, tamén tivemos tempo para descubrir algúns lugares especiais próximos a Briouze. Onda o profesorado e alumnado francés coñecemos monumentos históricos da comarca e mesmo chegamos ao Mont Saint Michel e a Saint Malo, xa nas portas da Bretaña.

Despois da actividade a semana, o venres chegou o día da estrea da obra. As familias acudiron todas ao Espace Culturel para ver os primeiros resultados do traballo. Queda aínda moito por ensaiar. Esa segunda parte da tarefa será a finais de abril, cando o alumnado francés veña visitarnos á Estrada. Ao final da función houbo apertas e xa as primeiras bágoas. Xúntanse as emocións dunha semana verdadeiramente intensa.

O sábado pola mañá despedímonos das familias. Briouze é unha vila pequecha. A acollida foi tan cálida coma a despedida. Marchamos agradecidos e con gana de acollelos cando veñan. Diso vai esta viaxe arredor do Principiño: de coñecer, de mirar outros "planetas" e de non perder a capacidade de sorprendernos na viaxe. 

A fin de semana en París foi un bo peche. Agora xa estamos de volta. Queda aínda moito traballo por facer na segunda parte deste intercambio. Darémolo todo para que saia tan ben coma esta primeira. A tout à l'heure !

Orgullosas da nosa ciencia e da nosa lingua

Esta semana, o alumnado de 1º de Bacharelato encheu o centro de sabedoría matemática coas actividades arredor da muller e a ciencia promovidas polo departamento de Matemáticas e a Biblioteca. Énchenos de fachenda o bo galego das nosas alumnas para falar das cousas do día a día e tamén para expresar coñecemento académico. La Voz de Galicia recolleuno nas súas páxinas. Lamentable é que, en cambio, un medio con ese nome rexeite contalo na lingua que as protagonistas empregaron... Algún día.

Noticia en La Voz de Galicia

Poñédevos creativas, poñédevos creativos

Veña, que esta semana remata o prazo para o Concurso de Microrrelatos e Micropoemas. Se aínda tedes algunhas frases ou algún verso por puír, ídelle dando, que o día 22 é o último día para presentardes os vosos traballos. Lembrade, estas son as bases.

Proxección videopoemas de amor

Cantos días encontramos inspiración na biblioteca do Losada... O 14 de febreiro fíxose no Losada un pase de recreo de videopoemas elaborados a partir de cantigas medievais galegas, vistas cos ollos de hoxe. Bo traballo o do alumnado de 3º da ESO, que compartiu creatividade a moreas e unha farta de amor.