Día de Rosalía 2018 no Losada

Aí queda o programa de actividades para o Día de Rosalía. #abrimosasfiestras a Rosalía.

Galego, lingua de amor no IES Antón Losada Diéguez

Un ano máis o galego é a lingua de amor no Losada. Nesta ocasión escollemos o fermoso poema de Bernardino Graña, "Como hei vivir mañá sen a luz túa " do libro Se o noso amor e os peixes... (1980)

Acompañámolo deste vídeo no que se recollen diferentes versións musicais do mesmo. Para gozares do amor na túa lingua.

AVELAÍÑAS NO TEATRO PRINCIPAL DA ESTRADA

Un ateigado Teatro Principal da Estrada acolleu a estrea do proxecto teatral deste curso, Unha avelaíña chamada ledicia, do grupo de teatro do IES Antón Losada Diéguez. As oito historias postas en escena a cargo dos máis de corenta actores e actrices, arrincaron o aplauso e a calor do público. Foi o pasado 28 de xaneiro.
Picando nesta imaxe poderás ver as fotos da representación:

UNHA AVELAÍÑA CHAMADA LEDICIA NO PRINCIPAL DA ESTRADA

O próximo domingo, 28 de xaneiro, a aula de teatro do IES Antón Losada Diéguez, Avelaías Teatro, porá en escena o espectáculo teatral UNHA AVELAÍÑA CHAMADA LEDICIA, ás 18:00 horas.Trátase dun espectáculo coral que está composto por oito historias que se vertebran a través da fascinación que  produce no ser humano a fantasía. Os títulos destas oito creacións colectivas son:

1.       Viaxe ao cero.

2.      Alicia.

3.      Vendedoras/-es de estrelas.

4.      A dirección do nariz.

5.      Un estraño bosque gris.

6.      Non podo durmir.

7.      Unha avelaíña chamada…

8.      O rei de Litonia.

A través desta viaxe ao proceso creador, o espectador participará nunha defensa acérrima dos valores que propicia o xogo, o traballo en equipo e a lectura como fonte de enriquecemento e crecemento persoal. Os personaxes deste espectáculo defenderán nestas historias creadas por eles mesmos valores como a paz, o respecto do medioambiente, a igualdade de xénero, a admiración polas persoas maiores, a valoración do mundo rural, a ollada esquecida dos desposuídos… como elementos imprescindibles para vivir nun mundo máis feliz, onde habiten persoas máis xustas, máis plenas e máis cultas.

            Unha avelaíña chamada... Ledicia  mergullará, por tanto, ao receptor no interese pola lectura como ferramenta que fomenta valores como a igualdade, a cooperación, o compromiso e a cultura da paz. Trátase dun espectáculo que desborda optimismo e esperanza nun futuro mellor para a humanidade e onde se aspira a que eses valores sexan unha realidade canto antes. Permítenos, ademais,  tocar ese soño cos dedos e establece unha defensa das relacións baseadas na tolerancia e a solidariedade; aspira a armar á poboación coa capacidade de diálogo e de entendemento; propugna un modelo de xustiza e igualdade de oportunidades para todos e todas, especialmente para aqueles seres humanos máis desfavorecidos. 

Aí quedan unhas imaxes dos ensaios da obra, así como da representación no CEIP de Figueiroa o pasado mes de decembro.

 

Así foi o a visita do alumnado do IES de Rodeira de Cangas ao Losada Diéguez

Comezamos 2018 cunha actividade celebrada no primeiro trimestre do curso. Foi o pasado 7 de novembro cando o alumnado de 4º da ESO do IES de Rodeira de Cangas do Morrazo se achegou a terras estradenses para formalizar a primeira das visitas do intercambio lingüístico entre os dous centros. O proxecto comezaba o curso pasado cando os rapaces e rapazas se intercambiaron correspondencia por escrito, co obxectivo de irense coñecendo.

Puideron encontrarse en persoa, e falar, obxectivo da actividade o pasado trimestre, nun día repleto de actividades das que gozaron visitantes e anfitrións. Comezou a xornada coa asistencia aos diálogos científicos que organizaba o EDL Losada xunto co Departemento de Bioloxía da que se pode ler e ver unha crónica aquí. A seguir desprazáronse en bus á vila da Estrada, para visitala, a pesar de que o tempo non era moi bo. Ao regreso repuxeron forzas nun xantar conxunto na Biblioteca do Losada que tivo como sobremesa un magosto preparado polo noso alumnado. Xa pola tarde todo o grupo se desprazou á Carballeira para participar nun xogo de pistas preparado polo Departamento de Galego. Día de experiencias novas, conversas, confidencias na nosa lingua, que terán continuación na visita que o alumnado de 4º ESO do Losada Diéguez fará proximamente a terras do Morrazo. Veremonos en Cangas!

Imaxe do grupo de participantes no intercambio

Podes ver máis fotos picando neste colaxe 

Máis info sobre o Equipo de Dinamización lingüística do IES de Rodeira no seu blog: LINGUALIZA

NADAL EN GALEGO

Aí quedan as propostas deste ano para ler no Nadal, na nosa lingua.

Aquí podes descargar o cartel, compartilo, imprimilo....:

Lecturas para o Nadal en Galego 2017 by elogolosada on Scribd

Ademais, este ano irncorporamos unha novidade. A versión en vídeo:

O IES Antón Losada na Festa da Poesía

Un ano máis o EDL do Losada enviou unha moi digna representación á Festa da Poesía que organiza o Concello da Estrada. Nesta ocasión foron dúas alumnas de bacharelato, Rebeca Mata e Lorena Rodríguez as que fixeron unha excelente lectura dos poemas. Aí quedan as imaxes: