Febreiro... Lingua de amor

O 14 de febreiro, no 2º recreo, vémonos na biblioteca!

Para sabermos máis: aula aumentada

A nosa aula aumentada desta semana foi unha supervisita a Santiago de Compostela co alumnado de 1º de Bacharelato e de 2º de FP Básica de Administrativo. Saímos dos libros e das paredes do centro e adentrámonos directamente na materia. Aula aumentada e vivida. Primeira parada: Parlamento de Galicia. Para sabermos como se cocen as leis que nos rexen e o control do Goberno. E mesmo nos atrevemos a practicar un pouco a dialéctica.

Despois fomos ao Museo do Pobo Galego, referente para a conservación da cultura galega, e unha oportunidade de achegármonos tamén a Antonio Fraguas, unha figura da que saberemos máis este ano ao dedicárselle o Día das Letras Galegas. No Museo tamén fomos todos guías por un día. Alumnos e alumnas prepararon o percorrido polos contidos das distintas salas: o mar. o campo, os instrumentos musicais, as crenzas tradicionais... Concluímos a visita, solemnemente, como cómpre, no Panteón de Galegos Ilustres.

Rematamos a xornada cunha visita á exposición Castelao Maxistral, arredor do simbolismo do cadro A derradeira leición do mestre.

Moito máis ca teatro

O venres 25 de xaneiro á noitiña, un grupo de 20 alumnos e alumnas do IES Antón Losada Diéguez gozaron con entusiasmo da sesión de contacontos de Lois Pérez no Teatro Principal, dentro do programa do Concello da Estrada en colaboración cos equipos de dinamización da lingua galega dos centros escolares. A afección ao teatro nace no teatro.

E o domingo, o Principal encheuse de novo con centos de alumnos, familiares e amigos que se animaron a pasar unha tarde teatral coa obra do grupo Avelaíñas do Losada "Vogando nos contos". No escenario, máis de 50 rapaces e rapazas construíndo para o público historias cheas de creatividade e de emoción. Aplaudimos a cachón. Porque isto é moito máis que teatro.

Últimas entradas! Últimas entradas!

A aula de teatro do IES Antón Losada Diéguez, Avelaíñas Teatro, o día 27 no Teatro Principal da Estrada, conseguirá que subades ao barco da fantasía vogando nos contos a través de numerosas escenas independentes unhas das outras pero todas fiadas pola imaxinacion e o xogo. Coñeceremos uns marabillosos reloxos con plumas, gozaremos dunha marabillosa lectura subxugante dun misterioso libro máxico e mesmo asistiremos ao roubo da lúa ladroa...
Estas e outras moitas historias espéranvos no Teatro Principal o día 27 de xaneiro. Non o perdades!

Nos versos de Avelina Valladares

Avelina Valladares, nacida en Vilancosta, na Estrada, no 1825 e finada en 1902, foi unha das primeiras mulleres que publicou artigos de opinión na prensa escrita. Tamén quixo cultivar a poesía en galego, e na nosa lingua atreveuse, naquel tempo, a escribir algúns dos seus poemas. Claro que este aprecio e interese na lingua propia era compartido na casa de Vilancosta. Seu irmán máis vello, Marcial Valladares, foi autor do Diccionario gallego-castellano, do 1884.

De Avelina Valladares e das mulleres pioneiras no seu tempo veunos falar ao IES Losada Diéguez esta semana Isabel Rei Samartim, afondando nelas desde a intensa relación coa música que gardaron estas mulleres. O alumnado de 4º da ESO recitou os versos da poeta estradense, aínda pouco coñecidos mesmo entre nós. Unha interesante sesión programada desde a Biblioteca do Centro en colaboración co Equipo de Dinamización da Lingua Galega.

Microrrelatos e micropoemas no forno

Esperamos que nas próximas semanas se vaia cocendo unha boa fornada de microrrelatos e de micropoemas para o concurso deste ano. Aquí vos deixamos de novo as bases. Lembrade que podedes participar ata o 22 de febreiro.

Abur, Reis Magos! Benvido, 2º trimestre!

Alá vai o Nadal. Que logo acaban as festas! Pero comezamos o segundo trimestre con ánimo, que hai que estrear ben o ano novo. Sen poñernos moitos propósitos, non está mal que vaiamos planificando as nosas tarefas.

Calendario 2º trimestre curso 2018-19